खोटाङमा बाँदर धपाउने क्रममा भरुवा बन्दुकको गोली लागेर एक जनाको मृत्यु

खोटाङ । दिक्तेल रुपाकोट मझुवागढी नगरपालिका–११ खार्मीमा बाँदर धपाउने क्रममा चलाइएको भरुवा बन्दुकको गोली लागेर एक जनाको मृत्यु भएको छ।

मकैबारीमा आएको बाँदरलाई धपाउने क्रममा स्थानीय ५४ वर्षीय भलबहादुर तामाङले चलाएको गोली लागेर सोही स्थानका ५२ वर्षीय श्यामबहादुर तामाङको मृत्यु भएको हो।

घटना मंगलबार दिउँसो करिब २ बजे भएको हो। भलबहादुरका अनुसार मकैबारीमा दैनिकजसो बाँदर आउने गरेपछि उनी र श्यामबहादुर मिलेर बाँदर धपाउन गएका थिए। दुवैतर्फबाट घेरा हालेर बाँदरलाई धपाउने क्रममा उनले बाँदरलाई लक्षित गरी भरुवा बन्दुक चलाएका थिए।

त्यसै क्रममा श्यामबहादुर गोलीको निशानामा परेको र टाउकोमा गोली लागेपछि घटनास्थलमै मृत्यु भएको भलबहादुरले बताएका छन्।

घटनापछि भलबहादुर आफैँले प्रहरीलाई फोन गरी घटनाबारे जानकारी गराएका थिए। सूचना पाएलगत्तै प्रहरी चौकी खार्मीबाट टोली घटनास्थल पुगेको थियो।

जिल्लाबाट थप प्रहरी टोली पुगेपछि घटनास्थलको सर्जमिन गरी मृतकको शव तथा भरुवा बन्दुक चलाउने भलबहादुरलाई जिल्ला पठाउने तयारी गरिएको वडा सदस्य वीरेन्द्र राईले जानकारी दिए।

घटनाबारे अनुसन्धान गर्न जिल्ला प्रहरी कार्यालय खोटाङका प्रहरी निरीक्षक निराजन बस्नेतको नेतृत्वमा टोली परिचालन गरिएको जिल्ला प्रहरी कार्यालय खोटाङका प्रमुख प्रहरी नायब उपरीक्षक प्रकाश बुढाथोकीले जानकारी दिएका छन्।